യുവ താരസുന്ദരി തൃഷ കൃഷ്ണൻ തെന്നിന്ത്യൻ സിനിമയിലെ ഏറ്റവും കൂടുതൽ ആരാധകരുള്ള നടിമാരിലൊരാളാണ്. അഭിനയ മികവ് കൊണ്ടും സൗന്ദര്യം കൊണ്ടും പ്രേക്ഷകരുടെ മനസ്സിലിടം നേടിയ തൃഷ ബോളിവുഡിലും തന്റെ സാന്നിധ്യമറിയിച്ചിട്ടുണ്ട്.
തമിഴിലെയും തെലുങ്കിലേയും യുവ സൂപ്പർതാരങ്ങൾക്കെല്ലാം ഒപ്പം സുപ്പർഹിറ്റ് സിനിമകളിൽ അഭിനയിച്ചിട്ടുള്ള തൃഷ നിവിൻ പോളിയുടെ നായികയായി മലയാളത്തിലും എത്തിയിരുന്നു. രജനികാന്ത്, വിജയ്, വിക്രം, സൂര്യ, അജിത്, വിജയ് സേതുപതി തുടങ്ങി തമിഴിലെ എല്ലാ മുൻനിര നായകന്മാരുടെയും നായികാ വേഷം ചെയ്തിട്ടുള്ള നടിയാണ് തൃഷ.
ഇപ്പോൾ മലയാളത്തിന്റെ താരരാജാവ് മോഹൻലാലിന്റെ നായികയായി ജീത്തു ജോസഫിന്റെ റാം എന്ന സിനിമയമൽ തൃഷ അഭിനയിക്കുകയാണ്.
അതേ സമയം തെന്നിന്ത്യൻ സിനിമയിലെ ഏറ്റവും മികച്ച നടിമാരുടെ കൂട്ടത്തിൽ സ്ഥാനമുള്ള ഈ നടിയോട് കഴിഞ്ഞ ദിവസം ഒരു ആരാധകൻ ഇൻസ്റ്റാഗ്രാമിൽ നടത്തിയ സംവാദത്തിനിടെ ചോദിച്ച ചോദ്യത്തിന്റെ ഉത്തരം ഇപ്പോൾ വൈറലാവുകയാണ്.
നിങ്ങളുടെ കാഴ്ചപ്പാടിൽ ഇന്ന് ഇന്ത്യൻ സിനിമയിലെ ഏറ്റവും മികച്ച മൂന്നു നടൻമാർ ആരൊക്കെയാണ് എന്നായിരുന്നു ആ ചോദ്യം. ഒട്ടും സംശയിക്കാതെ തന്നെ തൃഷയുടെ ഉത്തരവുമെത്തി. ഉലക നായകൻ കമൽ ഹാസൻ, കംപ്ലീറ്റ് ആക്ടർ മോഹൻലാൽ, ബോളിവുഡിന്റെ മിസ്റ്റർ പെർഫെക്ഷനിസ്റ്റ് ആമിർ ഖാൻ എന്നിവരുടെ പേരുകളാണ് തൃഷ മറുപടിയായി പറഞ്ഞത്.
തമിഴിൽ കമൽ ഹാസനൊപ്പം, മന്മഥൻ അമ്പ്, തൂങ്കാ വനം എന്നീ ചിത്രങ്ങളിൽ അഭിനയിച്ചിട്ടുള്ള തൃഷ മോഹൻലാലിനൊപ്പം റാം എന്ന മലയാള ചിത്രത്തിലും അഭിനയിച്ചു. ആ ചിത്രത്തിന്റെ ചിത്രീകരണം പൂർത്തിയായിട്ടില്ല. മണിരത്നത്തിന്റെ സ്വപ്ന ചിത്രമായ പൊന്നിയിൽ സെൽവൻ എന്ന ബ്രഹ്മാണ്ഡ ചിത്രത്തിലും അഭിനയിക്കുന്ന തൃഷ കൈ നിറയെ ചിത്രങ്ങളുമായി തിരക്കിലാണ്.
റാം, പൊന്നിയിൽ സെൽവൻ, പരമപാദം വിളയാട്ടു, ഗർജനൈ, റാങ്കി, ഷുഗർ എന്നിവയാണ് ഇപ്പോൾ തൃഷ ചെയ്യുന്ന ചിത്രങ്ങൾ. ഇരുപത്തിയൊന്ന് വർഷം മുൻപ് ജോഡി എന്ന തമിഴ് ചിത്രത്തിലൂടെ അരങ്ങേറ്റം കുറിച്ച തൃഷ തമിഴ്, തെലുങ്കു, ഹിന്ദി, മലയാളം ഭാഷകളിലായി ഏകദേശം അറുപതിനു മുകളിൽ ചിത്രങ്ങളിൽ ഇതിനോടകം അഭിനയിച്ചു കഴിഞ്ഞു.
