മെഗാസ്റ്റാർ മമ്മൂട്ടിയുടെ കാറിന് പിന്നാലെ സൈക്കിളിൽ പാഞ്ഞ് ചിത്രം പകർത്താൻ ശ്രമിക്കുന്ന കൗമാരക്കാരനായ ഒരു ആരാധകന്റെ വീഡിയോ ആണ് കഴിഞ്ഞ ദിവസം സോഷ്യൽമീഡിയ കൈയ്യടക്കികൊണ്ടിരുന്നത്. മമ്മൂട്ടിയുടെ കാർ അകലെ നിന്ന് വരുന്നത് കണ്ട പയ്യൻ മൊബൈൽ ക്യാമറ പ്രവർത്തിപ്പിച്ചുകൊണ്ട് വേഗത്തിൽ സൈക്കിൾ ചവിട്ടുകയായിരുന്നു. സ്വന്തം ജീവൻ പോലും അപകടപ്പെടുത്തിയായിരുന്നു ആരാധനാ മൂർത്തിയെ ക്യാമറയിൽ പകർത്താൻ ശ്രമം നടത്തിയത്.
കാർ അടുത്തെത്തുമ്പോൾ വലിയ ആവേശത്തോടെ ഇക്കാ, ടാറ്റാ എന്നും ഈ കൊച്ചുപയ്യൻ ആവേശത്തോടെ പറയുന്നത് വീഡിയോയിൽ കേൾക്കാം. ശേഷം, വിൻഡോ ഗ്ലാസ് താഴ്ത്തിയിട്ടിരിക്കുന്ന മമ്മൂട്ടി കൈവീശി കാണിക്കുന്നുമുണ്ട്. ശേഷം ഒരു പുഞ്ചിരിയും മമ്മൂട്ടിയുടെ മുഖത്ത് വിരിയുന്നുണ്ട്. താരത്തിന്റെ പിറന്നാൾ ദിനത്തിൽ നടനും സ്റ്റാന്റപ്പ് കൊമേഡിയനുമായ രമേശ് പിഷാരടിയാണ് രസകരമായ വീഡിയോ പങ്കുവെച്ചത്.
‘അകത്തും പുറത്തും സ്‌നേഹത്തോടെ…’ എന്നാണ് വീഡിയോയ്ക്ക് പിഷാരടി നൽകിയിരിക്കുന്ന ക്യാപ്ഷൻ. ജനറേഷൻ ഗാപ്പ് ഇല്ലാതെ എല്ലാവരും ഒരുപോലെ ഇഷ്ടപ്പെടുന്ന നടനാണ് മമ്മൂട്ടി. താരത്തിന്റെ പ്രായം മാത്രം എപ്പോഴും റിവേഴ്‌സ് ഗിയറിലാണ്. അടുത്തിടെയാണ് നടൻ 71-ാം പിറന്നാൾ ആഘോഷിച്ചത്. നിരവധി ആരാധകർ തലേന്ന് രാത്രി തന്നെ വീടിന്റെ പടിക്കലെത്തി പിറന്നാൾ ആശംസകൾ നേർന്നിരുന്നു.
എല്ലാ കാര്യത്തിലും പുത്തൻ ജനറേഷനെ പോലും കടത്തി വെട്ടുന്ന തരത്തിൽ അപ്‌ഡേറ്റായി ജീവിക്കുന്ന വ്യക്തിയാണ് മമ്മൂക്ക. സോഷ്യൽമീഡിയയിലും ട്രെൻഡിംഗ് രീതിയിലും താരം എന്നും ഒരുപടി മുൻപിലാണ്. സഹപ്രവർത്തകരുടെ വിശേഷങ്ങളും തന്റെ സിനിമാ വിശേഷങ്ങളും കൊച്ചുമകൾ മറിയത്തോടൊപ്പമുള്ള വിശേഷങ്ങളുമെല്ലാം താരം പലപ്പോഴായി ആരാധകരുമായി പങ്കുവെയ്ക്കാറുണ്ട്.
ഫേസ്ബുക്കിൽ മാത്രമല്ല ഇൻസ്റ്റഗ്രാമിലും നടൻ സജീവമായി നിൽക്കുന്നുണ്ട്. പുത്തൻ ചിത്രങ്ങളും പങ്കുവെച്ച് ആരാധകരെ താരം ഞെട്ടിക്കാറുണ്ട്. ഇതുവരെ നൂറ്റി എഴുപത് പോസ്റ്റുകളാണ് മമ്മൂട്ടി പങ്കുവെയ്ക്കാറുണ്ട്. അവയിൽ സിനിമാ വിശേഷങ്ങൾ പങ്കുവെച്ചുകൊണ്ടുള്ള പോസ്റ്ററുകൾക്കൊപ്പം സ്റ്റൈലൻ ചിത്രങ്ങളും താരം പങ്കിടാറുണ്ട്. പരോൾ എന്ന സിനിമയുടെ പോസ്റ്റർ പങ്കുവെച്ചുകൊണ്ട് 2018 ഏപ്രിൽ ആറിനാണ് മമ്മൂട്ടി ഇൻസ്റ്റഗ്രാമിൽ സജീവമായി തുടങ്ങിയത്.
നിലവിൽ, മുപ്പത്തി മൂന്ന് ലക്ഷത്തിൽ അധികം ആളുകൾ ഇൻസ്റ്റഗ്രാമിൽ മമ്മൂട്ടിയെ ഫോളോ ചെയ്യുന്നുണ്ട്. മലയാള സിനിമയിലെ ഒട്ടുമിക്ക യുവ നടന്മാരും താരത്തെ ഫോളോ ചെയ്യുന്നവരുടെ കൂട്ടത്തിലുണ്ട്. അതേസമയം, മുപ്പത്തിമൂന്ന് ലക്ഷത്തിലധികം ആളുകൾ തന്നെ ഫോളോ ചെയ്യുമ്പോൾ മമ്മൂട്ടി ഫോളോ ചെയ്യുന്നത് രണ്ട് പേരെ മാത്രമാണ്.
ഒന്ന് മകൻ ദുൽഖർ സൽമാനാണ്. രണ്ടാമത്തെ ആളാണ് ഏവരെയും ഞെട്ടിക്കുന്നത്. രണ്ടാമത്തെ ആൾ ജിനു ബെന്നാണ്. പേര് പരിചിതമല്ലെങ്കിലും കാഴ്ചയിൽ ജിനു പ്രേക്ഷകരുടെ പ്രിയപ്പെട്ട താരമാണ്. നടനും റേഡിയോ ജോക്കിയും ഡബ്ബിങ് ആർട്ടിസ്റ്റും എല്ലാമാണ് ജിനു. അഞ്ച് സുന്ദരികൾ എന്ന അന്തോളജിയിൽ കുള്ളന്റെ ഭാര്യ എന്ന ചിത്രത്തിൽ അഭിനയിച്ച കുള്ളൻ തന്നെയാണ് ജിനു.
