ബ്രഹ്മാണ്ഡ ചിത്രം ബാഹുബലിക്ക് ശേഷം പ്രഭാസ് നായകനാകുന്ന ‘സാഹോ’ ഓഗസ്റ്റ് 30ന് റിലീസ് ചെയ്യുകയാണ്. 300 കോടി രൂപ ബജറ്റിൽ ഒരുങ്ങുന്ന ഈ ത്രില്ലർ ഒരു ഹോളിവുഡ് ചിത്രത്തിൻറെ സാങ്കേതികത്തികവോടെയാണ് പുറത്തിറങ്ങുന്നത്.
ശ്രദ്ധ കപൂർ നായികയാകുന്ന ചിത്രത്തിൽ ജാക്കി ഷ്റോഫ്, നീൽ നിതിൻ മുകേഷ്, മന്ദിര ബേദി, ചുങ്കി പാണ്ഡേ, മഹേഷ് മഞ്ജരേക്കർ, അരുൺ വിജയ്, ലാൽ, ടിന്നു ആനന്ദ്, കിഷോർ തുടങ്ങി എല്ലാ ഭാഷകളിൽ നിന്നുമായി വൻ താരനിരയാണുള്ളത്.
തെലുങ്ക്, തമിഴ്, ഹിന്ദി ഭാഷകളിലായി റിലീസ് ചെയ്യുന്ന സാഹോ, ബാഹുബലിയുടെ ബ്ലോക്ബസ്റ്റർ വിജയം ആവർത്തിക്കുമെന്ന് പ്രതീക്ഷിക്കപ്പെടുന്നു. അതേസമയം, സാഹോയുടെ വരവുമായി ബന്ധപ്പെട്ട് മറ്റ് പല സിനിമകളുടെയും റിലീസുകൾ മാറ്റി ക്രമീകരിക്കുന്നുണ്ട്.
സാഹോയുടെ ട്രെയിലർ പുറത്തിറങ്ങി. അസാധാരണമായ ആക്ഷൻ രംഗങ്ങളാലും മനസിനെ മയക്കുന്ന റൊമാൻസ് രംഗങ്ങളാലും സമ്ബന്നമാണ് സാഹോ എന്നാണ് ട്രെയിലർ നൽകുന്ന സൂചന. ഒരു അണ്ടർകവർ പൊലീസ് ഓഫീസറായാണ് സാഹോയിൽ പ്രഭാസ് അഭിനയിക്കുന്നതെന്നാണ് വിവരം.
