ടിക് ടോക് വീഡിയോകളിലൂടെയും യൂട്യൂബിലൂടെയുമൊക്കെ മലയാളികൾക്ക് ഏറെ സുപരിചിതയാണ് സ്വാതിക വിനോദ്. മോഡലിങ് രംഗത്തും സജീവമാണ് താരം. ഇപ്പോഴിതാ അവിയൽ എന്ന ചിത്രത്തിലൂടെ മലയാള സിനിമയിലേക്ക് അരങ്ങേറ്റം കുറിച്ചിരിക്കുകയാണ് സ്വാതിക.
ഇപ്പോഴിതാ തന്റെ ആദ്യ ചിത്രം അവിയലിന്റെ വിശേഷങ്ങൾ പങ്കുവയ്ക്കുകയാണ് സ്വാതിക. ടിക് ടോക്കിലൂടെയും ഷോർട്ട് വീഡിയോസിലൂടെയും ഒക്കെയാണ് സിനിമയിലേക്കെത്തുന്നത്. സിനിമയെക്കുറിച്ച് ഒന്നും അറിയില്ലായിരുന്നു. സിനിമ ബാക്ക്ഗ്രൗണ്ട് ഉള്ള കുടുംബത്തിൽ നിന്നുള്ള ആളുമല്ല ഞാൻ. അതുകൊണ്ടു തന്നെ അവിയലിന്റെ ലൊക്കേഷനിൽ എത്തിയപ്പോൾ ഒരു വണ്ടർലാന്റിൽ എത്തിയ അനുഭവമായിരുന്നു.
എല്ലാം ഒരു ഫാന്റസിയായാണ് തോന്നിയത്. ലൊക്കേഷനിലേക്ക് എത്തിയപ്പോഴാണ് മനസിലാകുന്നത് അത് വേറെയൊരു ലോകമാണെന്ന്. ഷൂട്ടിങ് സ്ഥലത്തൊക്കെ നിരവധി ആളുകൾ. ഒരുപാട് ആളുകളുടെ മുന്നിൽ വച്ച് അഭിനയിക്കേണ്ടി വരുമെന്നും നല്ല ആത്മവിശ്വാസം വേണമെന്നുമൊക്കെ പിന്നീടാണ് മനസിലായത്. ഷൂട്ടിങ്ങിന്റെ ആദ്യ ദിവസം നല്ല ടെൻഷൻ ഉണ്ടായിരുന്നു.
നല്ല സ്റ്റേജ് ഫിയർ ഉള്ള കൂട്ടത്തിലുമാണ് ഞാൻ. ചിത്രീകരണത്തിന് ഒരു ദിവസം മുന്നേ ലൊക്കേഷനിൽ എത്തിയിരുന്നു. സംവിധായകനും നടൻ സിറാജുമൊക്കെ നന്നായി സപ്പോർട്ട് ചെയ്തു. മാക്‌സിമം എന്നെ കംഫർട്ട് ആക്കിയിട്ടാണ് സീൻ ഷൂട്ട് ചെയ്തത്. സിറാജിന്റെ ആദ്യ ചിത്രമാണെങ്കിലും അദ്ദേഹം നന്നായി ഹാർഡ് വർക്ക് ചെയ്യുമായിരുന്നു.
സെക്കന്റ് ഷെഡ്യൂളിലായിരുന്നു ഷൂട്ട്. ടിക് ടോക്ക് ഉണ്ടായിരുന്ന സമയം ആയിരുന്നതു കൊണ്ടുതന്നെ ഷൂട്ട് കഴിയുമ്പോൾ വീഡിയോയൊക്കെ ചെയ്യുമായിരുന്നു. പത്ത് പന്ത്രണ്ട് ദിവസത്തെ ഷൂട്ടായിരുന്നു ഉണ്ടായിരുന്നത്. നായകന്റെ ജീവിത കാലഘട്ടങ്ങൾ പറയുന്ന ചിത്രമാണ് അവിയൽ. അതിൽ സ്‌കൂൾ കാലഘട്ടത്തിലുള്ള കഥാപാത്രമാണ് എന്റെ വേഷം.
2018 ലായിരുന്നു എന്റെ ഭാഗങ്ങൾ ചിത്രീകരിച്ചത്. സ്‌കൂൾ കാലമൊക്കെ കഴിഞ്ഞിട്ട് നിൽക്കുന്ന ഒരു സമയമായിരുന്നു അത്. ഫുൾ ഫൺ ആയിരുന്നു ലൊക്കേഷനൊക്കെ. ദുബായിലാണ് ഞാൻ ഇപ്പോൾ താമസിക്കുന്നത്. അവധിയ്ക്ക് നാട്ടിലെത്തിയപ്പോഴാണ് സംവിധായകൻ ഷാനിലിനെ കാണുന്നത്.
അതിന് മുൻപ് തന്നെ അവിയലിൽ അവസരം ലഭിച്ചിരുന്നു. ഷാനിലിക്ക കഥ പറഞ്ഞ് ഒരു മാസത്തോളം കഴിഞ്ഞാണ് ഷൂട്ടിങ് തുടങ്ങുന്നത്. വണ്ണം വയ്ക്കരുതെന്നും സ്‌കൂൾ കുട്ടിയുടെ വേഷമാണ് എന്നുമൊക്കെ ഷാനിലിക്ക പറഞ്ഞിരുന്നു.
സിനിമ കാണാൻ ഒരുപാട് ഇഷ്ടമുള്ള കൂട്ടത്തിലുള്ള ഒരാളാണ് ഞാൻ.
തമിഴ് സിനിമകൾ കാണാനാണ് ഏറെ ഇഷ്ടം. സിനിമയിലേക്ക് എത്തുമെന്ന് ഒരിക്കലും വിചാരിച്ചതല്ല. പാട്ട്, ഡാൻസ് ഇതൊന്നും അറിയാത്തതു കൊണ്ട് സിനിമയിലെത്തുമെന്നൊന്നും കരുതിയിരുന്നില്ല. ബികോമിന് ശേഷം കാബിൻ ക്രൂ കോഴ്‌സും പൂർത്തിയാക്കിയ ശേഷമാണ് സോഷ്യൽ മീഡിയയിൽ സജീവമാകുന്നത്.
പിന്നെ ലോക്ക്ഡൗൺ സമയത്ത് മോഡലിങ് ചെയ്യാൻ തുടങ്ങി. ഇപ്പോൾ മോഡലിങും യൂട്യൂബ് ചാനലുമൊക്കെയായി പോകുന്നു. വീട്ടിൽ എല്ലാവരും നല്ല സപ്പോർട്ടാണ്. അച്ഛൻ, അമ്മ, സഹോദരങ്ങൾ എല്ലാവരും നൽകുന്ന പിന്തുണ വളരെ വലുതാണെന്നും താരം പറയുന്നു.
