താരരാജാവ് മോഹൻലാൽ നായകനായി എത്തി 200 കോടി ക്ലബ്ബിൽ ഇടം പിടിച്ച സിനിമയായി ലൂസിഫർ.
മുരളി ഗോപി എഴുതി മലയാളത്തിന്റെ യൂത്ത് ഐക്കൺ പൃഥ്വിരാജ് സംവിധാനം ചെയ്ത ലൂസിഫർ മലയാള സിനിമ ചരിത്രത്തിലെ തന്നെ വലിയ വിജയങ്ങളിൽ ഒന്നായി മാറിയിരുന്നു.
ആന്റണി പെരുമ്പാവൂർ ആശിർവാദ് സിനിമാസിന്റെ ബാനറിൽ നിർമ്മിച്ച ഈ ബിഗ് ബജറ്റ് ചിത്രത്തിനൊരു രണ്ടാം ഭാഗമായ് എമ്പുരാൻ എന്ന ചിത്രം ലൂസിഫർ വിജയാഘോഷവേളയിൽ തന്നെ അണിയറപ്രവർത്തകർ പ്രഖ്യാപിച്ചിരുന്നു. ഇപ്പോഴിതാ എമ്പുരാനിൽ മോഹൻലാലിനൊപ്പം മലയാളികളുടെ പ്രിയങ്കരനായ മറ്റൊരു സൂപ്പർതാരം ഉണ്ടായേക്കും എന്ന തരത്തിലുള്ള അഭ്യൂഹങ്ങൾ പരക്കുകയാണ്.
മെഗാസ്റ്റാർ മമ്മൂട്ടി എമ്പുരാനിൽ അഭിനയിക്കുമെന്നാണ് പ്രചരിക്കുന്ന വാർത്ത. എന്നാൽ ഈ അഭ്യൂഹങ്ങൾക്ക് ശക്തി പകർന്ന് കൊണ്ട് മമ്മൂട്ടിക്കൊപ്പമുള്ള ഒരു സെൽഫി ചിത്രം തിരക്കഥാകൃത്ത് മുരളി ഗോപി തന്റെ ഫേസ്ബുക്ക് പേജിൽ പങ്കുവെച്ചിരിക്കുകയാണ്.
മമ്മൂട്ടിയാണ് ഈ സെൽഫി എടുത്തിരിക്കുന്നത്. ചിത്രത്തോടൊപ്പം, മൂന്ന് മണിക്കൂർ മമ്മൂട്ടിയുമൊത്ത് ചിലവഴിക്കാൻ സാധിച്ചതിലുള്ള സന്തോഷവും മുരളി ഗോപി വിവരിക്കുന്നുണ്ട്. ഇതാണ് സംശയം ഉണർത്തുന്നത്.
മമ്മൂട്ടിയോട് എമ്പുരാൻ സിനിമയുടെ കഥ ചർച്ച ചെയ്യാൻ പോയതാണോ എന്ന തരത്തിലുള്ള ചോദ്യങ്ങളാണ് മുരളി ഗോപി പങ്കുവെച്ച മമ്മൂട്ടി ചിത്രത്തിന് താഴെ മുഴുവൻ. നേരത്തെ, മമ്മൂട്ടിയുടെ ജന്മദിനത്തിൽ ഇൻസ്റ്റാഗ്രാമിൽ മുരളി ഗോപി നടത്തിയ ആശംസയും അതിന് പിന്നാലെ എത്തിയ പൃഥ്വിരാജിന്റെ കമന്റുമാണ് എമ്പുരാനിൽ മമ്മൂട്ടിയും ഉണ്ടായേക്കാമെന്നുള്ള അഭ്യൂഹങ്ങൾക്ക് തുടക്കം കുറിച്ചത്.
ഞങ്ങളുടെ സൂപ്പർ നടന് ജന്മദിനാശംസകൾ, നിങ്ങൾ മഹത്വത്തിലും സമാധാനത്തിലും ദീർഘായുസ്സോടെ ജീവിക്കട്ടെ എന്ന് മുരളിഗോപി കുറിച്ചു. ഈ കമന്റിന് പൃഥ്വിരാജ് എന്നാ പിന്നെ എന്ന് ഒരു മൂങ്ങയുടെ ഇമോജിയ്ക്കൊപ്പം മറുപടി ഇട്ടിരുന്നു.
അതേ സമയം ലൂസിഫർ ഇറങ്ങിയതിന് ശേഷമാണ് ഇല്യുമിനാറ്റി എന്ന വാക്ക് മലയാളികൾ ശ്രദ്ധിച്ച് തുടങ്ങിയത്. ലോകത്തെ തന്നെ നിയന്ത്രിക്കാൻ കഴിവുള്ള കുറച്ചു പേർ അടങ്ങുന്ന ഒരു നിഗൂഢ ഗ്രൂപ്പിനെയാണ് ഇല്യുമിനാറ്റി എന്ന് പറയുന്നത്.
ലൂസിഫർ എന്ന ചിത്രത്തിൽ മോഹൻലാൽ അവതരിപ്പിച്ച സ്റ്റീഫൻ നെടുമ്പള്ളി എന്ന കഥാപാത്രത്തിന്റെ അബ്രാം ഖുറേഷി എന്ന മുഖം ഇല്യുമിനാറ്റിയുടെ വക്താവായാണ് കാണിച്ചിരിക്കുന്നത്. അതുകൊണ്ട് തന്നെ ലൂസിഫറിന്റെ രണ്ടാം ഭാഗമായ എമ്പുരാനിൽ ഇല്യുമിനാറ്റികളെ പറ്റിയുള്ള കൂടുതൽ വെളിപ്പെടുത്തലുകൾ ഉണ്ടാകുമെന്ന വിശ്വാസത്തിൽ അക്ഷമയോടെ കാത്തിരിക്കുകയാണ് ആരാധകർ.
എമ്പുരാന്റെ ഷൂട്ടിംഗ് അടുത്ത വർഷം ആദ്യം തുടങ്ങുമെന്ന് നിർമ്മാതാവ് ആന്റണി പെരുമ്പാവൂരും, ഒരു സൂപ്പർസ്റ്റാർ അർഹിക്കുന്ന തരത്തിലുള്ള സിനിമ തന്നെയായിരിക്കും എമ്പുരാനിലൂടെ ലാലേട്ടന് താൻ നൽകുകയെന്ന് പൃഥ്വിയും അടുത്തിടെ പറഞ്ഞിരുന്നു. ഏതായാലും പുതിയ സംഭവ വികാസങ്ങളോടെ ലാലേട്ടൻ ആരാധകർക്ക് ഒപ്പം മമ്മൂക്ക ആരാധകരും ആകാംഷയോടെ കാത്തിരിക്കുകയാണ് ഈ ചിത്രത്തിന്റെ ഓരോ അപ്‌ഡേഷനുകളും.
