മലയാളത്തിന്റെ താരരാജാവ് മോഹൻലാൽ തമിഴകത്തിന്റെ നടിപ്പിൻ നായകൻ സൂര്യ എന്നിവരുടെ ആരാധകർ ഒരു പോലെ കാത്തിരിക്കുന്ന ചിത്രമാണ് കാപ്പാൻ. ഓഗസ്റ്റ് 30 ന് ചിത്രം തീയേറ്ററുകളിൽ എത്തുമെന്ന് മുമ്പ് പ്രഖ്യാപിച്ചിരുന്നു. എങ്കിൽ ഇപ്പോഴിതാ പുറത്തുവരുന്ന റിപ്പോർട്ടുകൾ പ്രകാരം ചിത്രത്തിന്റെ റിലീസ് സെപ്റ്റംബറിലേക്ക് മാറ്റാനാണ് അണിയറപ്രവർത്തകർ തീരുമാനിച്ചിരിക്കുന്നത്.
കാരണം മറ്റൊന്നുമല്ല. മുമ്പ് നിശ്ചയിച്ചിരുന്ന ഓഗസ്റ്റ് 30 എന്ന റിലീസ് തീയതിയിൽ തന്നെ പ്രഭാസിന്റെ ബ്രഹ്മാണ്ഡ ചിത്രം സാഹോയും തീയേറ്ററുകളിലെത്തും. രണ്ട് വമ്പൻ ചിത്രങ്ങൾ തമ്മിലുള്ള പോരിന് അവസരമൊരുക്കാൻ ഇരുസിനിമയുടെയും നിർമ്മാതാക്കൾ ആഗ്രഹിക്കുന്നില്ലെന്നാണ് വിവരം. എന്നാൽ ഇതുസംബന്ധിച്ച ഒദ്ദ്യോഗിക സ്ഥിരീകരണം ഇതുവരെ ഉണ്ടായിട്ടില്ല.
പ്രഭാസും ശ്രദ്ധാകപൂറും പ്രധാന വേഷത്തിലെത്തുന്ന ബിഗ്ബജറ്റ് ചിത്രം സാഹോ 2017 ലാണ് ചിത്രീകരണം തുടങ്ങിയത്. സുജീത്ത് സംവിധാനം ചെയ്യുന്ന ചിത്രത്തിന്റെ ടീസറിനും ആദ്യ ഗാനത്തിനും സോഷ്യൽ മീഡിയയിൽ വൻ സ്വീകരണമാണ് ലഭിച്ചത്.
മലയാളം സിനിമാ താരം ലാൽ, ജാക്കി ഷ്രോഫ്, നീൽ നിതിൻ മുകേഷ്, മന്ദിര ബേദി, ചങ്കി പാണ്ഡേ, മഹേഷ് മഞ്ജറേക്കർ, അരുൺ വിജയ്, മുരളി ശർമ, ടിനു ആനന്ദ്, ശരത് ലോഹിതഷ്വ, എവിലിൻ ശർമ്മ, വെനില കിഷോർ തുടങ്ങിയവരും ചിത്രത്തിലണിനിരക്കുന്നു.
ബിഗ് ബജറ്റ് ചിത്രം നിർമ്മിക്കുന്നത് യുവി ക്രിയേഷന്റെ ബാനറിൽ വാംസി പ്രമോദാണ്. പ്രമുഖ സംഗീത സംവിധായകൻ ജിബ്രാനാണ് ചിത്രത്തിന്റെ പശ്ചാത്തല സംഗീതം ഒരുക്കിയിരിക്കുന്നത്.പ്രശസ്ത ഹോളിവുഡ് ആക്ഷൻ കോഓർഡിനേറ്റർ കെന്നി ബേറ്റ്സാണ് ചിത്രത്തിന്റെ ആക്ഷൻ ഡയറക്ടർ. ബാഹുബലിയുടെ ആർട്ട് ഡയറക്ടറായിരുന്ന സാബു സിറിലാണ് സാഹോയുടെയും കലാസംവിധായകൻ. ഛായാഗ്രഹണം ആർ മഥിയും എഡിറ്റിങ് ശ്രീകർ പ്രസാദും നിർവഹിക്കുന്നു.
