തന്റെ ഇഷ്ടതാരത്തിന്റെ മുന്നിൽ നിന്ന് അദ്ദേഹത്തിന്റെ ശബ്ദം അനുകരിക്കാൻ സാധിക്കുക എന്നത് ഒരു കലാകാരനെ സംബന്ധിച്ചിടത്തോളം വലിയ അംഗീകാരമാണ്.
അത്തരത്തിൽ മമ്മൂട്ടിയുടെ മുന്നിൽ നിന്ന് അദ്ദേഹത്തിന്റെ ശബ്ദം അനുകരിക്കുന്ന ആരാധകന്റെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്.
ഹക്കീം പട്ടേപ്പാടം എന്ന വ്യക്തിയാണ് മമ്മൂട്ടിയുടെ മുന്നിൽ അദ്ദേഹത്തിന്റെ ശബ്ദം അനുകരിച്ചത്. മമ്മൂട്ടി ചിത്രമായ ദാദാസാഹിബ് എന്ന ചിത്രത്തിലെ ക്ലൈമാക്സ് സീനിലെ നെടുനീളൻ ഡയലോഗാണ് ഹക്കീം അവതരിപ്പിച്ചത്. ഇത് ചിരിച്ചാസ്വദിക്കുന്ന മമ്മൂട്ടിയെയും വീഡിയോയിൽ കാണാം.
ഇരുന്ന് പറഞ്ഞാൽ മതിയെന്ന് മമ്മൂട്ടി നിർബന്ധിച്ചിട്ടും ഹക്കിം താരത്തിന് മുന്നിൽ നിന്നു കൊണ്ട് തന്നെ തെല്ലു പരിഭ്രമത്തോടെ ശബ്ദം അനുകരിക്കുകയായിരുന്നു.
പഞ്ചവർണ്ണതത്തക്കു ശേഷം രമേശ് പിഷാരടി സംവിധാനം ചെയ്യുന്ന ഗാനഗന്ധർവനിലാണ് മമ്മൂട്ടി ഇപ്പോൾ അഭിനയിക്കുന്നത്.
രമേശ് പിഷാരടിയും ഹരി പി. നായരും ചേർന്ന് രചിച്ച ഈ ചിത്രത്തിൽ കലാസദൻ ഉല്ലാസ് എന്ന ഗാനമേള ഗായകൻ ആയാണ് മമ്മൂട്ടി എത്തുക. ഷൂട്ടിംഗ് പുരോഗമിച്ചു കൊണ്ടിരിക്കുന്ന ചിത്രം ഓണം റിലീസ് ആയി എത്തും.
