ഇളയ ദളപതി വിജയിയും അറ്റ്‌ലീയും തെരി, മെർസൽ എന്നീ ഹിറ്റ് ചിത്രങ്ങൾക്ക് ശേഷം ബിഗിൽ എന്ന മെഗാമാസ്സ് സ്‌പോർട്സ് മൂവിയ്ക്ക് വേണ്ടി ഒന്നിക്കുകയാണ്. വനിതാ ഫുട്‌ബോൾ ടീമിനെ പരിശീലിപ്പിക്കാനായി എത്തുന്ന കോച്ചായിട്ടാണ് വിജയ് ചിത്രത്തിലെത്തുന്നതെന്നാണ് ലഭിക്കുന്ന സൂചന.
കൂടാതെ സോൾട്ട് ആൻഡ് പെപ്പർ ലുക്കിലായിരിക്കും വിജയിയുടെ കഥാപാത്രം എത്തുക. ചിത്രത്തിൽ മലയാളികളുടെ കറുത്തമുത്ത് ഐഎം വിജയനും ഒരു പ്രധാന വേഷത്തിലെത്തുമെന്നാണ് റിപ്പോർട്ട്. ഇരു കാലഘട്ടങ്ങളിലുള്ള വ്യത്യസ്ത ലുക്കുകളിൽ വിജയ് ചിത്രത്തിലെത്തുന്നുണ്ടെന്നാണ് സൂചന.
ഇതിൽ അച്ഛൻ കഥാപാത്രമാകുന്ന വിജയിയ്‌ക്കൊപ്പമുള്ള കാലഘട്ടത്തിൽ ആയിരിക്കും ഐഎം വിജയന്റെ നിർണായക വേഷം അരങ്ങേറുക .സിനിമയുടെ പശ്ചാത്തലം ഫുട്ബോളായതിനാൽ വിജയന്റെ സാന്നിധ്യം ബിഗിൽ എന്ന സിനിമയ്ക്ക് ഏറെ ഗുണകരമാകും. ഇത് ആദ്യമായാണ് അദ്ദേഹം വിജയ് ചിത്രത്തിൽ ഒരു മികച്ച കഥാപാത്രമായി എത്തുന്നത്.
മറ്റു വിവരങ്ങൾ ഒന്നും ഇതുവരെ പുറത്തു വിട്ടിട്ടില്ല.വിജയ് അറ്റ്‌ലീ ഭാഗ്യ കൂട്ടുകെട്ടിലെ ആദ്യ രണ്ടു ചിത്രങ്ങളും ബ്ലോക്ബസ്റ്റർ ഹിറ്റുകളായിരുന്നു. മെർസൽ 200 കോടി നേടിയിരുന്നു, ബിഗിലിന് വലിയ പ്രതീക്ഷയാണ് ആരാധകർ നൽകുന്നത്.
സർക്കാരിന് ശേഷമാണ് വിജയുടെ പുതിയ സിനിമ ബിഗിൽ എത്തുന്നത്. എജിഎസ് എന്റർടെയ്ൻമെന്റ്‌സാണ് വിജയ് ചിത്രം നിർമ്മിക്കുന്നത്. ലേഡീ സൂപ്പർസ്റ്റാർ നയൻതാര നായികാ വേഷത്തിൽ എത്തുന്ന ചിത്രത്തിൽ യോഗി ബാബു, ഡാനിയേൽ ബാലാജി, റെബ മോണിക്ക ജോൺ, വിവേക്, കതിർ, ജാക്കി ഷ്‌റോഫ് തുടങ്ങിയവരും അഭിനയിക്കുന്നു.
ഈ ചിത്രം നിലവിലെ തമിഴ്നാട് കേരള ഫസ്റ്റ് ഡേ കളക്ഷൻ തകർക്കുമെന്നും 300 കോടിയിലധികം ഫൈനൽ കളക്ഷൻ നേടുമെന്നും ബോക്സ് ഓഫീസ് അനലിസ്റ്റുകൾ വിലയിരുത്തുന്നു. ബോളിവുഡിന്റെ കിംഗ് ഖാൻ ഷാരൂഖും ഈ സിനിമയിൽ ഒരു പ്രധാന വേഷത്തിലെത്തുന്നുണ്ട്.
