നാർക്കോട്ടിക്സ് ഈസ് എ ഡേർട്ടി ബിസിനിസ് സൂപ്പർ ഹിറ്റായിരുന്ന ഇരുപതാം നൂറ്റാണ്ടിലും പിന്നീട് 200 കോടി ചിത്രമായ ലൂസിഫറിലും ഗംഭീര ഹിറ്റായ മോഹൻലാലിന്റെ ഡയലോഗ് ആണിത്.യൂത്ത് ഐക്കൺ പൃഥ്വിരാജ് സംവിധായകനായ ലൂസിഫറിൽ മോഹൻലാലിന്റെ ഈ സംഭാഷണം ഏറെ ആവേശത്തോടെയാണ് ആരാധകർ ഏറ്റെടുത്തത്.
ഇപ്പോഴിതാ ലൂസിഫറിലെ ആ മാസ് ഡയലോഗിന്റെ മേക്കിംഗ് വീഡിയോ പുറത്തുവിട്ടിരിക്കുകയാണ് ലൂസിഫറിന്റെ അണിയറപ്രവർത്തകർ. റിലീസ് ചെയ്ത് 50 ദിവസങ്ങൾക്കുള്ളിൽ 200 കോടി ക്ലബ്ബിലെത്തി, ഈ നേട്ടം കൈവരിച്ച ആദ്യ മലയാളസിനിമയായി ലൂസിഫർ മാറിയിരുന്നു.
മോഹൻലാൽ, വിവേക് ഒബ്‌റോയ്, മഞ്ജു വാര്യർ, ടൊവിനോ തോമസ്, സായികുമാർ, ഇന്ദ്രജിത്ത്, കലാഭവൻ ഷാജോൺ, നൈല ഉഷ, ബൈജു സന്തോഷ്, ഫാസിൽ, സച്ചിൻ ഖേദേകർ, ശിവജി ഗുരുവായൂർ, ബാല, ശിവദ തുടങ്ങിയ വൻ താരനിരയെക്കൂടാതെ പൃഥ്വിരാജും സിനിമയിൽ പ്രധാനപ്പെട്ട ഒരു വേഷം ചെയ്തിരുന്നു.
ചിത്രത്തിന്റെ രണ്ടാം ഭാഗം എമ്പുരാൻ കഴിഞ്ഞ ദിവസം പ്രഖ്യാപിച്ചിരുന്നു.
കൊച്ചിയിലെ മോഹൻലാലിന്റെ വീട്ടിൽവെച്ചായിരുന്നു രണ്ടാംഭാഗത്തിന്റെ പ്രഖ്യാപനം. സംവിധായകൻ പൃഥ്വിരാജ്, തിരക്കഥാകൃത്ത് മുരളി ഗോപി, നിർമാതാവ് ആന്റണി പെരുമ്പാവൂർ തുടങ്ങിയവർ പ്രഖ്യാപനത്തിൽ പങ്കെടുത്തു.
