സൂപ്പർഹിറ്റ് സിനിമയായ കുമ്പളങ്ങി നൈറ്റ്സിലെ മറ്റൊരു ഡിലീറ്റഡ് സീൻ അണിയറ പ്രവർത്തകർ പുറത്തുവിട്ടു. ഫഹദ് ഫാസിൽ അവതരിപ്പിച്ച ഷമ്മി എന്ന കഥാപാത്രവും ഭാര്യ സിമിയും സഹോദരി ബേബി മോളും ഉൾപ്പെടുന്ന രംഗങ്ങളാണ് നിർമ്മാതാക്കളുടെ യൂട്യൂബ് ചാനലായ ഭാവനാ സ്റ്റുഡിയോസ് പുറത്തുവിട്ടിരിക്കുന്നത്.
സിമിയുടെ ചിറ്റപ്പന്റെ വീട്ടിലെ വിരുന്നിൽ പങ്കെടുത്ത് ഷമ്മിയും സിമിയും ബേബിയും തിരിച്ചുപോകുന്നതിനിടെയുള്ള രസകരമായ സംഭാഷണങ്ങൾ അടങ്ങിയ സീനാണ് പുറത്തുവിട്ടിരിക്കുന്നത്.
മികച്ച പ്രതികരണമാണ് ഈ വിഡിയോയ്ക്ക് ലഭിക്കുന്നത്. ചിത്രത്തിന്റെ പ്രധാന ആകർഷണമായിരുന്നു ഫഹദ് അവതരിപ്പിച്ച ഷമ്മി എന്ന കഥാപാത്രം.
മധു സി നാരായണൻ സംവിധാനം ചെയ്ത കുമ്പളങ്ങി നൈറ്റ്‌സിന്റെ തിരക്കഥ ശ്യാം പുഷ്‌കരന്റെതാണ്. വർക്കിംഗ് ക്ലാസ് ഹീറോയുടെ ബാനറിൽ ദിലീഷ് പോത്തനും ശ്യാം പുഷ്‌കരനും ഫഹദ് ഫാസിൽ ആൻഡ് ഫ്രണ്ട്‌സ് എന്ന നിർമ്മാണ കമ്പനിയുടെ ബാനറിൽ നസ്രിയ നസീമും ചേർന്നാണ് ചിത്രം നിർമ്മിച്ചത്.
ഫഹദ് ഫാസിലിനു പുറമെ സൗബിൻ ഷാഹിർ, ഷെയ്ൻ നിഗം, ശ്രീനാഥ് ഭാസി, അന്ന ബെൻ, ഗ്രേസ് ആന്റണി തുടങ്ങിയവരായിരുന്നു ചിത്രത്തിൽ പ്രധാന വേഷങ്ങളിലെത്തിയിരുന്നത്. ഷൈജു ഖാലിദ് ക്യാമറയും സുഷിൻ ശ്യാം സംഗീത സംവിധാനവും നിർവഹിച്ചു.
