ആൻഡ്രോയ്ഡ് കുഞ്ഞപ്പൻ എന്ന സിനിമയുടെ തമിഴ് പതിപ്പായ ‘ഗൂഗിൾ കുട്ടപ്പ’യുടെ ടീസർ ഇറങ്ങി. സുരാജ് വെഞ്ഞാറമ്മൂട്, സൗബിൻ സാഹിർ എന്നിവർ പ്രധാന കഥാപാത്രങ്ങളെ അവതരിപ്പിച്ച് സംസ്ഥാന പുരസ്‌കാരം ഉൾപ്പെടെ സ്വന്തമാക്കിയ മലയാളത്തിലെ ആൻഡ്രോയിഡ് കുഞ്ഞപ്പന്റെ തമിഴ് പതിപ്പിൽ സംവിധായകൻ കെ എസ് രവികുമാറാണ് സുരാജ് അവതരിപ്പിച്ച ഭാസ്‌കര പൊതുവാൾ എന്ന കഥാപാത്രത്തെ അവതരിപ്പിക്കുന്നത്.
രവികുമാറിന്റെ സംവിധാന സഹായികളായിരുന്ന ശബരി, ശരവണൻ എന്നിവരൊന്നിച്ചാണ് ചിത്രം സംവിധാനം ചെയ്യുന്നത്. ഇരുവരുടെയും ആദ്യ സംവിധാന സംരംഭം കൂടിയാണിത്.
ALSO READ
ചിത്രം നിർമിക്കുന്നതും രവികുമാർ തന്നെയാണ്. ബിഗ് ബോസ് താരം ദർഷനാണ് സൗബിൻ അവതരിപ്പിച്ച കഥാപാത്രത്തെ അവതരിപ്പിക്കുന്നത്. യോഗി ബാബുവും ചിത്രത്തിൽ മുഖ്യവേഷത്തിലെത്തുന്നു. മദൻ കാർക്കി വൈരമുത്തുവാണ് ഗാനരചന. ഗിബ്രാൻ ആണ് സംഗീത സംവിധാനം നിർവഹിക്കുന്നത്.
മൂൺഷോട്ട് എന്റർടെയ്ൻമെന്റിന്റെ ബാനറിൽ സന്തോഷ് ടി കുരുവിള നിർമ്മിച്ച് രതീഷ് ബാലകൃഷ്ണൻ പൊതുവാൾ സംവിധാനം ചെയ്ത ‘ആൻഡ്രോയ്ഡ് കുഞ്ഞപ്പൻ 5.25’ എന്ന ചിത്രം പ്രേക്ഷക ശ്രദ്ധനേടിയിരുന്നു. സൗബിൻ ഷാഹിറും സുരാജ് വെഞ്ഞാറമൂടും കേന്ദ്ര കഥാപാത്രങ്ങളായെത്തിയ ചിത്രത്തിന് മികച്ച പ്രേക്ഷക നിരൂപക പ്രതികരണമാണ് ലഭിച്ചത്.
ഒരച്ഛനും മകനും അവർക്കിടയിലെ ഒരു റോബോട്ട് അഥവാ ഹ്യൂമനോയിഡുമായുള്ള ബന്ധമാണ് ‘ആൻഡ്രോയ്ഡ് കുഞ്ഞപ്പൻ 5.25’ പറഞ്ഞത്. മലയാളത്തിൽ ഏറെ പുതുമയുള്ള പ്രമേയമായിരുന്നു അത്.
കുഞ്ഞപ്പൻ ആരാധകരെ സന്തോഷത്തിലാഴ്ത്തികൊണ്ട് ഇപ്പോഴിതാ രണ്ടാം ഭാഗവും ഒരുങ്ങുകയാണ്.
ALSO READ
ആൻഡ്രോയ്ഡ് കുഞ്ഞപ്പന് രണ്ടാം ഭാഗം ഒരുങ്ങുന്നതായി നിർമ്മാതാവ് സന്തോഷ് ടി കുരുവിള അറിയിച്ചു. രതീഷ് ബാലകൃഷ്ണൻ പൊതുവാൾ തന്നെ രചനയും സംവിധാനവും നിർവഹിയ്ക്കുന്ന ചിത്രത്തിന് ഏലിയൻ അളിയൻ എന്നാണ് പേര് നൽകിയിരിക്കുന്നത്. എസ് ടി കെ ഫ്രെയിംസിന്റെ ബാനറിൽ സന്തോഷ് ടി കുരുവിളയാണ് ചിത്രം നിർമ്മിക്കുന്നത് .
2019 ൽ പുറത്തിറങ്ങിയ സിനിമകളിൽ ഏറ്റവും കൂടുതൽ പ്രേക്ഷക സ്വീകാര്യത നേടിയ ചിത്രമാണ് ‘ആൻഡ്രോയ്ഡ് കുഞ്ഞപ്പൻ’. സുരാജ് വെഞ്ഞാറമൂട് കേന്ദ്ര കഥാപാത്രത്തെ അവതരിപ്പിച്ച സിനിമ പ്രായഭേദമന്യേ എല്ലാ മലയാളികളും ഒരുപോലെ സ്വീകരിച്ചു. പ്രായമേറിയുള്ള കഥാപാത്രമായി വിസ്മയിപ്പിക്കുന്ന പ്രകടനമാണ് ചിത്രത്തിൽ സുരാജ് വെഞ്ഞാറമൂട് കാഴ്ചവച്ചത്. 2019-ലെ മികച്ച നടനുള്ള കേരളസംസ്ഥാന ചലച്ചിത്രപുരസ്‌കാരം ആൻഡ്രോയ്ഡ് കുഞ്ഞപ്പൻ, വികൃതി എന്നീ സിനിമകളിലൂടെയാണ് സുരാജിന് കിട്ടിയത്.
ഒരു സയൻസ്- ഫിക്ഷൻ ചിത്രമാണെങ്കിലും തമാശകളും വൈകാരിക നിമിഷങ്ങളുമെല്ലാം ചേർന്ന് പ്രേക്ഷകരെ സ്പർശിക്കാൻ ‘ആൻഡ്രോയ്ഡ് കുഞ്ഞപ്പന്’ സാധിച്ചിരുന്നു. ‘കൂഗിൾ കുട്ടപ്പ’യും ആകാംഷയോടെയാണ് പ്രേക്ഷകർ കാത്തിരിക്കുന്നത്.
