വെങ്കിട് പ്രഭു സംവിധാനം ചെയ്ത് 2011ൽ പുറത്തിറങ്ങിയ സൂപ്പർഹിറ്റ് ചിത്രമായിരുന്നു മങ്കാത്ത. തമിഴകത്തിന്റെ സൂപ്പർ താരം തല അജിത്തിന്റെ കരിയറിൽ വലിയ വഴിത്തിരിവുണ്ടാക്കിയ ചിത്രം കൂടി ആയിരുന്നു മങ്കാത്ത.
സംവിധായകൻ വെങ്കട് പ്രഭുവിനും തമിഴിൽ ബ്രേക്ക് നൽകിയ ചിത്രമായിരുന്നു. ആക്ഷൻ ത്രില്ലർ ചിത്രമായിരുന്ന മങ്കാത്തയിൽ വിനായക് മഹാദേവ് എന്ന കഥാപാത്രമായി പൂണ്ടുവിളയാടിയിരുന്നു അജിത്ത്. ചിത്രത്തിലെ അജിത്തിന്റെ പ്രകടനം വലിയ രീതിയിൽ ശ്രദ്ധിക്കപ്പെട്ടിരുന്നു.
തലയ്ക്കൊപ്പം ആക്ഷൻകിങ് അർജുൻ, തൃഷ, ലക്ഷ്മി റായ്, വൈഭവ്, പ്രേംജി അമരൻ തുടങ്ങിയരാണ് ചിത്രത്തിൽ മറ്റ് പ്രധാന വേഷങ്ങളിൽ എത്തിയിരുന്നത്. അതേസമയം തിയ്യേറ്ററുകളിൽ മെഗാ ബ്ലോക്ക്ബസ്റ്ററായ മങ്കാത്തയുടെ രണ്ടാം ഭാഗത്തിനായി വലിയ ആകാംക്ഷകളോടെയാണ് ആരാധകർ കാത്തിരിക്കുന്നത്.
ഇപ്പോഴിതാ ഉടൻതന്നെ മങ്കാത്ത 2 സംഭവിക്കുമെന്നാണ് കോടമ്പാക്കം റിപ്പോർട്ടുകൾ സൂചിപ്പിക്കുന്നത്. അതിലുപരി ആരാധകരെ സന്തോഷത്തിലാക്കുന്നത് മങ്കാത്ത 2ൽ ദളപതി വിജയ് കൂടി എത്തുമെന്നുള്ളതാണ്. സംവിധായകൻ വെങ്കട് പ്രഭു തന്നെ മുൻപ് ഒരഭിമുഖത്തിൽ അജിത്ത് ചിത്രത്തിന്റെ രണ്ടാം ഭാഗത്തെ കുറിച്ച് തുറന്നു പറഞ്ഞിരുന്നു.
മങ്കാത്ത 2വിനായി തല ദളപതി മാരുടെ സമ്മതത്തിനായി കാത്തിരിക്കുകയാണെന്ന് ആണ് സംവിധായകൻ പറഞ്ഞത്. മങ്കാത്ത 2വിൽ അർജുന്റെ റോളിൽ വിജയ് എത്തിയാൽ നന്നാകുമെന്ന അഭിപ്രായമാണ് അണിയറക്കാർക്കുള്ളത്. മുൻപ് മങ്കാത്ത ചിത്രീകരണ സമയത്ത് വിജയോടും അജിത്തിനോടും ഒരുമിച്ചൊരു ചിത്രം ചെയ്യണമെന്ന് വെങ്കട് പ്രഭു പറഞ്ഞിരുന്നു.
അന്ന് രണ്ട് പേരും താൽപര്യം പ്രകടിപ്പിക്കുകയും ചെയ്തിരുന്നു. അതേസമയം മങ്കാത്ത 2 അജിത്തിനെയും വിജയിയെയും മനസിൽ കണ്ടാണ് സംവിധായകൻ പ്ലാൻ ചെയ്യുന്നതെന്നാണ് റിപ്പോർട്ടുകൾ സൂചിപ്പിക്കുന്നത്. എന്നാൽ സിനിമയുടെ ജോലികൾ ഇതുവരെ ആരംഭിച്ചിട്ടില്ല.
നിലവിൽ ചിമ്പുവിനെ വെച്ചുളള മാനാട് എന്ന ചിത്രത്തിന്റെ തിരക്കിലാണ് സംവിധായകനുളളത്. കല്യാണി പ്രിയദർശനാണ് ചിത്രത്തിൽ നായികയായി എത്തുന്നത്. ഈ സിനിമയുടെ ജോലികൾ നേരത്തെ ആരംഭിച്ചിരുന്നെങ്കിലും ലോക്ഡൗൺ കാരണം നിർത്തിവെക്കേണ്ടി വന്നിരുന്നു. ചിമ്പുവും വെങ്കട് പ്രഭുവും ആദ്യമായി ഒന്നിക്കുന്ന ചിത്രം കൂടിയാണ് മാനാട്.
