കേരളത്തിൽ ഏറ്റവും കൂടുതൽ ആരാധകരുള്ള തമിഴ് സൂപ്പർതാരമാണ് ദളപതി വിജയ്. വിജയ് നായകനായി എത്തുന്ന സിനിമകൾക്ക് എല്ലാം വലിയ സ്വീകരണമാണ് കേരളത്തിൽ ലഭിക്കുന്നത്.
വിജയിയുടെ ഇനി റിലീസ് ചെയ്യാനുള്ള ചിത്രമാണ് ലോകേഷ് കനകരാജ് സംവിധാനം ചെയ്ത മാസ്റ്റർ. മാർച്ചിൽ റിലീസ് തീരുമാനിച്ചിരുന്ന വിജയിയുടെ 64ാം ചിത്രമായ മാസ്റ്റർ കൊവിഡ് വ്യാപനത്തെ തുടർന്നാണ് നീട്ടിവെച്ചത്.
ഈ ഘട്ടത്തിൽ വിജയിയുടെ മറ്റൊരു ചിത്രത്തെ കുറിച്ചുള്ള റിപ്പോർട്ടാണ് സിനിമാലോകത്ത് ചർച്ചയായിട്ടുള്ളത്. ബിഗ്ബോസ് ഷോ നിർമ്മാതാക്കളായ എൻഡെമോൾ ഷൈനും വിജയിയും ഒരു ചിത്രത്തിന് വേണ്ടി ഒരുമിക്കുന്നുവെന്നാണ് പുതിയ റിപ്പോർട്ടുകൾ.
വിജയിയുടെ 66ാം ചിത്രമാണ് എൻഡെമോൾ നിർമ്മിക്കുക എന്നാണറിയുന്നത്. ബിഗ് സ്‌ക്രീനിൽ കൂടുതൽ ചിത്രങ്ങൾ നിർമ്മിക്കാനാണ് എൻഡെമോൾ തീരുമാനം. അരങ്ങേറ്റം ഗംഭീരമാക്കുന്നതിന് വേണ്ടിയാണ് വിജയ് എന്ന പേരിലേക്ക് എൻഡെമോൾ എത്തിയത്.
അതേ സമയം വിജയിയുടെ മാസ്റ്ററിന് ശേഷമുള്ള അടുത്ത ചിത്രം നിർമ്മിക്കുന്നത് സൺ പിക്ചേഴ്സാണ്. തമൻ സംഗീതം നിർവഹിക്കുന്നുവെന്നത് മാത്രമാണ് ചിത്രത്തെ കുറിച്ചുള്ള വിവരം. മറ്റ് വിവരങ്ങളെല്ലാം വിജയിയുടെ ജന്മദിനമായ ജൂൺ 22ന് പ്രഖ്യാപിക്കുമെന്നാണ് കരുതുന്നത്. ഏആർ മുരുഗദോസ് ആയിരിക്കും ഈ സിനിമ സംവിധാനം ചെയ്യുന്നതെന്നും സ്ഥിരീകരിക്കാത്ത ചില റിപ്പോർട്ടുകൾ പുറത്തു വരുന്നുണ്ട്.
