മലയാളത്തിന്റെ അഭിനയ ചക്രവർത്തി പ്രിയ താരം മോഹൻലാലിന് ഇന്ന് അറുപത് വയസ്സ് തികയുകയാണ്. ലാലേട്ടന്റെ പിറന്നാളിനെ വരവേട്ടുകൊണ്ട് താരങ്ങളും ആരാധകരും എല്ലാം രംഗത്ത് എത്തിയിരിക്കുകയാണ്. നിരവധി പേരാണ് സോഷ്യൽ മീഡിയയിൽ താരത്തിന് ആശംസകളുമായി രംഗത്ത് എത്തിയിരിക്കുന്നത്.
ഈ പിറന്നാൾ ദിനത്തിൽ ലാലേട്ടന് ആശംസകളുമായി ലേഡി സൂപ്പർതാരം നടി മഞ്ജു വാര്യരും രംഗത്ത് എത്തിയിരിക്കുകയാണ്. തന്റെ ഫേസ്ബുക്ക് പോസ്റ്റിലൂടെയാണ് മഞ്ജു വാര്യർ മോഹൻലാലിന് ആശംസയുമായി എത്തിയത്.
തിരയടിച്ചുകൊണ്ടേയിരിക്കുന്ന കടൽ, ആകാശംതൊടുന്ന കൊടുമുടി, തപോവനത്തിലെ വലിയ അരയാൽ, മഞ്ഞിൽ വിരിഞ്ഞൊരു പൂവ് മോഹൻലാൽ എന്ന വാക്ക് നമ്മെ പല ദൃശ്യങ്ങളും ഓർമിപ്പിക്കുന്നുണ്ട് എന്നാണ് ഫേസ്ബുക്കിൽ മഞ്ജു കുറിച്ചത്.
ഏതു പാത്രത്തിലെടുക്കുമ്പോഴും അതിന്റെ രൂപം പ്രാപിക്കുന്നൊരു പുഴയാണ് ലാലേട്ടനെന്നും പുഴയ്ക്ക് പ്രായമില്ലെന്നും താരം പറയുന്നു. ഒരുവട്ടം കണ്ട ലാലേട്ടനെയല്ല പിന്നീട് കാണാനാകുക. ഓരോ തവണയും കാണുന്ന മോഹൻലാൽ പുതുതാണ്.
ഇനിയും ഞങ്ങളെ ആനന്ദിപ്പിച്ച് ഒഴുകിക്കൊണ്ടേയിരിക്കുക, ലാലേട്ടാ- മഞ്ജു കുറിച്ചു. മലയാളികളുടെ എക്കാലത്തേയും ഇഷ്ടജോഡിയാണ് മോഹൻലാലും മഞ്ജു വാര്യരും. രണ്ടാം വരവിന് ശേഷവും മഞ്ജു ഏറ്റവും കൂടുതൽ അഭിനയിച്ചതും മോഹൻലാലിനൊപ്പമാണ്.
മഞ്ജു വാര്യരുടെ ഫേസ്ബുക്ക് പോസ്റ്റ് പൂർണരുപം:
മോഹൻലാൽ എന്ന വാക്ക് നമ്മെ പല ദൃശ്യങ്ങളും ഓർമിപ്പിക്കുന്നു. തിരയടിച്ചുകൊണ്ടേയിരിക്കുന്ന കടൽ… ആകാശംതൊടുന്ന കൊടുമുടി. തപോവനത്തിലെ വലിയ അരയാൽ. മഞ്ഞിൽ വിരിഞ്ഞൊരു പൂവ്… എന്റെ മനസിൽ പലപ്പോഴും തോന്നിയിട്ടുള്ളത് ഏതു പാത്രത്തിലെടുക്കുമ്‌ബോഴും അതിന്റെ രൂപം പ്രാപിക്കുന്നൊരു പുഴയാണ് ലാലേട്ടനെന്നാണ്.
പുഴയ്ക്ക് പ്രായമില്ല. അതുകൊണ്ട് 60 വയസ് എന്നത് കേവലം ഒരു സംഖ്യ മാത്രമായിട്ടേ കാണുന്നുള്ളൂ. ഇങ്ങനെയൊരു നടനപ്രവാഹത്തെ നോക്കിനിൽക്കാൻ സാധിക്കുന്നു എന്നത് തന്നെ ഭാഗ്യം. ആ ഒഴുക്കിനൊത്ത് നീങ്ങാൻ ചിലപ്പോഴൊക്കെ സാധിച്ചു എന്നത് വ്യക്തിപരമായ സന്തോഷം. അപ്പോഴൊക്കെ അദ്ഭുതത്തോടെ കണ്ടിട്ടുണ്ട്, മുന്നിൽ ഓരോ തുള്ളിയിലും ഒരുപാടൊരുപാട് ഭാവങ്ങൾ ഓളം വെട്ടുന്നത്.
ഒരു പുഴയിൽ രണ്ടാമതൊരുവട്ടം ഇറങ്ങാനാവില്ല എന്നൊരു പഴമൊഴിയുണ്ട്. അതുപോലെ ഒരുവട്ടം കണ്ട ലാലേട്ടനെയല്ല പിന്നീട് കാണാനാകുക. ഓരോ തവണയും കാണുന്ന മോഹൻലാൽ പുതുതാണ്. ഇനിയും ഞങ്ങളെ ആനന്ദിപ്പിച്ച് ഒഴുകിക്കൊണ്ടേയിരിക്കുക, ലാലേട്ടാ നിരന്തരം ഒരുപാട് കാലം
പിറന്നാൾ ആശംസകൾ.
