കഴിഞ്ഞ വർഷം വൻ വിജയം നേടിയ ചെക്ക ചിവന്ത വാനം എന്ന മൾട്ടിസ്റ്റാർ ചിത്രത്തിന് ശേഷം പ്രശസ്ത സംവിധായകൻ മണി രത്‌നം ഒരുക്കാൻ പോകുന്നത് പൊന്നിയിൽ സെൽവൻ എന്ന ബ്രഹ്മാണ്ഡ ചിത്രമാണ്. മണി രത്‌നത്തിന്റെ സ്വപ്ന ചിത്രം എന്ന് വിശേഷിപ്പിക്കാവുന്ന പൊന്നിയിൽ സെൽവൻ ലൈക്ക പ്രൊഡക്ഷൻസ്, മണിരത്നത്തിന്റെ മദ്രാസ് ടാകീസ് എന്നിവ ചേർന്നാകും നിർമ്മിക്കുക എന്നാണ് സൂചന.
ഈ വർഷം അവസാനത്തോടെ ഷൂട്ടിംഗ് ആരംഭിക്കുന്ന ഈ ചിത്രത്തിൽ വമ്പൻ താര നിരയാണ് അണിനിരക്കുന്നത്. ചിയാൻ വിക്രം, ജയം രവി, ഐശ്വര്യ റായ്, കാർത്തി, കീർത്തി സുരേഷ്, അമല പോൾ, സത്യരാജ് എന്നിവർ ഈ ചിത്രത്തിന്റെ താര നിരയിൽ ഉണ്ടാകും എന്നാണ് സൂചന. മലയാളത്തിൽ നിന്ന് ജയറാം ഈ ചിത്രത്തിന്റെ ഭാഗം ആയി എത്തും എന്ന് അദ്ദേഹം തന്നെ ഇപ്പോൾ സ്ഥിതീകരിച്ചു കഴിഞ്ഞു. എന്നാൽ ഇപ്പോൾ വരുന്ന റിപ്പോർട്ടുകൾ അനുസരിച്ചു മലയാളത്തിൽ നിന്ന് സൂപ്പർ താരം മോഹൻലാലും പ്രശസ്ത നടി ഐശ്വര്യ ലക്ഷ്മിയും ഈ ചിത്രത്തിന്റെ ഭാഗമായേക്കാം.
കൽക്കി കൃഷ്ണമൂർത്തി എഴുതിയ അഞ്ചു ഭാഗങ്ങൾ ഉള്ള ബ്രഹ്മാണ്ഡ നോവൽ ആണ് പൊന്നിയിൻ സെൽവൻ. ചോള സാമ്രാജ്യത്തിലെ രാജാവായിരുന്ന അരുൾമൊഴിവർമ്മനെ (രാജരാജ ചോളൻ ഒന്നാമൻ) കുറിച്ചുള്ളതാണ് ഈ നോവലാണ് ‘പൊന്നിയിൻ സെൽവൻ’. 2400 പേജുകളുള്ള ഈ നോവൽ തമിഴിലാണ് രചിക്കപ്പെട്ടിട്ടുള്ളത്. അഞ്ചു ഭാഗങ്ങൾ ഉള്ള ബ്രഹ്മാണ്ഡ നോവലാണ് ഇതെന്നതിനാൽ അതു ചുരുക്കി, രണ്ട് ഭാഗങ്ങളുള്ള സിനിമയാക്കാനാണ് മണി രത്‌നത്തിന്റെ ശ്രമം.
