മമ്മൂട്ടിയുടെ ബിലാൽ മലയാളത്തിന്റെ വികാരമാണ്. കേരളം പഴയ കേരളമല്ലെങ്കിലും ബിലാലിന് മാറ്റമൊന്നും വന്നിട്ടില്ല.
ആ സ്‌റ്റൈലും ചങ്കുറപ്പും അങ്ങനെ തന്നെ. അമൽ നീരദ് ഇനി ബിലാലിന്റെ ജോലികളിലേക്ക് കടക്കുകയാണ്.
ബിഗ്ബിയേക്കാൾ ഉജ്ജ്വലമായ ഒരു കഥയാണ് ബിലാലിനായി അമൽ നീരദ് കണ്ടെത്തിയിരിക്കുന്നത്.
ഒന്നാന്തരം പഞ്ച് ഡയലോഗുകളും മാസ് മുഹൂർത്തങ്ങളുമായി ഒരു ത്രില്ലർ തിരക്കഥയൊരുക്കാനുള്ള ശ്രമത്തിലാണ് ഉണ്ണി ആർ. ബിഗ്ബി 2ന്റെ ക്യാമറ ചലിപ്പിക്കുന്നതും അമൽ നീരദ് തന്നെയായിരിക്കും.
അമൽ നീരദും ഉണ്ണി ആറും ചേർന്നെഴുതിയ തിരക്കഥയിൽ അമൽ നീരദ് ബിഗ്ബി എന്ന തന്റെ ആദ്യ സിനിമ സംവിധാനം ചെയ്തത് 2007ലാണ്.
അന്നുമുതൽ ഇന്നുവരെ മലയാളത്തിലെ ഏറ്റവും സ്‌റ്റൈലിഷായ സിനിമകളുടെ പട്ടികയെടുക്കുമ്പോൾ അതിൽ ഒന്നാമനായി ബിഗ്ബിയും അതിലെ നായകൻ ബിലാൽ ജോൺ കുരിശിങ്കലുമുണ്ടാവും.
മമ്മൂട്ടിയുടെ കരിയറിലെ ഏറ്റവും അടിപൊളി കഥാപാത്രങ്ങളിലൊന്നായിരുന്നു ബിലാൽ. ആ സിനിമയിൽ മമ്മൂട്ടി പറഞ്ഞ വൺലൈനറുകൾ പ്രേക്ഷകരുടെ നെഞ്ചിൽ തറച്ചുതന്നെ നിൽക്കുന്നുണ്ട് ഇപ്പോഴും.
എന്നാൽ മമ്മൂട്ടി പറഞ്ഞതുകൊണ്ടാണ് അത്തരം ഡയലോഗുകൾക്ക് ഇത്രയും കരുത്തുണ്ടായത് എന്നാണ് തിരക്കഥാകൃത്ത് ഉണ്ണി ആർ പറയുന്നത്.
‘ബിഗ്ബിക്ക് ഒരു പുതുമയുണ്ടായിരുന്നു. വ്യത്യസ്തതയുണ്ടായിരുന്നു. ആ ചിത്രത്തിലെ വൺലൈനറുകളൊക്കെ മമ്മൂട്ടി എന്ന നടൻ പറഞ്ഞാൽ മാത്രമേ നിലനിൽക്കൂ.
കൊച്ചി പഴയ കൊച്ചിയല്ല എന്നൊക്കെ മമ്മൂട്ടിക്ക് മാത്രമേ മലയാളത്തിൽ ആ ശൈലിയിൽ പറഞ്ഞ് ഹിറ്റാക്കാൻ പറ്റൂ’ ഒരു അഭിമുഖത്തിൽ ഉണ്ണി ആർ പറഞ്ഞിരുന്നു.
‘രൺജി പണിക്കരൊക്കെ ഡയലോഗ് വച്ച് ആൾക്കാരെ മുൾമുനയിൽ നിർത്തുന്ന ഇടത്തായിരുന്നു നമുക്ക് പിടിച്ചുനിൽക്കേണ്ടിയിരുന്നത്.
നെടുങ്കൻ ഡയലോഗുകൾക്ക് പകരം വൺലൈനറുകൾ പരീക്ഷിക്കാമെന്ന് അങ്ങനെയാണ് അമൽ നീരദിനോട് പറയുന്നത്.
അമ്പ് തറയ്ക്കുന്നതുപോലെയുള്ള അത്തരം സംഭാഷണങ്ങളാണ് ബിലാൽ എന്ന കഥാപാത്രത്തിൽ നിന്ന് പ്രേക്ഷകരും പ്രതീക്ഷിക്കുന്നത് ആ അഭിമുഖത്തിൽ ഉണ്ണി ആർ പറയുന്നു.
