നാദിർഷ മിമിക്രി കലാകാരൻ, ഗായകൻ, ഗാനരചയിതാവ്, ടെലിവിഷൻ അവതാരകൻ, നടൻ, സംവിധായകൻ, സംഗീത സംവിധായകൻ ഇങ്ങിനെ വിവിധ മേഖലകളിൽ തന്റെ കഴിവു തെളിയിച്ച അതുല്യ കലാകാരനാണ് .
മിമിക്രി വേദികളിൽ നിന്ന് കാലത്തിന്റെ വളർച്ചയ്ക്കൊപ്പം തന്നെ യാത്ര ചെയ്ത് ഉയർന്നു വന്ന നാദിർഷ ഇന്ന് ഹിറ്റ് ചിത്രങ്ങളുടെ സ്രഷ്ടാവാണ്. നാദിർഷയുടെ സംവിധാനത്തിൽ ഒരുങ്ങിയ അമർ അക്ബർ അന്തോണിയും കട്ടപ്പനയിലെ ഋത്വിക് റോഷനും വമ്പൻ ഹിറ്റുകളായിരുന്നു.
എന്നാൽ നീണ്ട 14 വർഷത്തോളമായി അഭിനയത്തിൽ നിന്ന് വിട്ടുനിന്ന നാദിർഷ വീണ്ടും നടന്റെ കുപ്പായമണിഞ്ഞിരിക്കുകയാണ്.
വ്യാസൻ കെപി സംവിധാനത്തിൽ ദിലീപ് നായകനായെത്തുന്ന ശുഭരാത്രി എന്ന ചിത്രത്തിലൂടെയാണ് അഭിനയ രംഗത്തേക്കുള്ള നാദിർഷയുടെ മടങ്ങിവരവ്.
ചിത്രത്തിലെ നാദിർഷയുടെ ക്യാരക്ടർ പോസ്റ്റർ അണിയറ പ്രവർത്തകർ പുറത്തുവിട്ടു. ചിത്രത്തിൽ സിദ്ധിഖിന്റെ മകന്റെ റോളിലാണ് നാദിർഷ എത്തുക. ഷാനവാസ് എന്നാണ് നാദിർഷയുടെ കഥാപാത്രത്തിന്റെ പേര്.
ഏറെ നിരൂപക പ്രശംസ നേടിയ ‘അയാൾ ജീവിച്ചിരിപ്പുണ്ട’് എന്ന ചിത്രത്തിനു ശേഷം വ്യാസൻ കെപി രചനയും സംവിധാനവും നിർവഹിക്കുന്ന ചിത്രമാണ് ശുഭരാത്രി. ചിത്രത്തിൽ നായികയായി എത്തുന്നത് അനു സിത്താരയാണ്.
നെടുമുടി വേണു, സായികുമാർ, സുരാജ് വെഞ്ഞാറമൂട്, ഇന്ദ്രൻസ്, ഹരീഷ് പേരടി, മണികണ്ഠൻ, സൈജു കുറിപ്പ്, സുധി കോപ്പ, സന്തോഷ് കീഴാറ്റൂർ, പ്രശാന്ത്, ചേർത്തല ജയൻ, ശാന്തി കൃഷ്ണ, ആശാ ശരത്ത്, ഷിലു ഏബ്രഹാം, കെപിഎസി ലളിത, തെസ്നി ഖാൻ എന്നിവരാണ് ചിത്രത്തിലെ മറ്റുതാരങ്ങൾ. സംഗീതം ബിജിബാൽ. നിർമ്മാണം അരോമ മോഹൻ. വിതരണം അബാം മൂവീസ്.
