പൃഥ്വിരാജ് ആദ്യമായി സംവിധാനം ചെയ്യുന്ന ലൂസിഫറിന്റെ പതിനഞ്ചാമത്തെ ക്യാരക്റ്റര്‍ പോസ്റ്റര്‍ പുറത്ത്. പ്രമുഖ സംവിധായകന്‍ ഫാസില്‍ അവതരിപ്പിക്കുന്ന കഥാപാത്രത്തിന്റെ പോസ്റ്ററാണ് പുറത്തുവന്നിരിക്കുന്നത്.
പുരോഹിതന്റെ വേഷത്തില്‍ നില്‍ക്കുന്ന ഫാസിലിനെയാണ് പോസ്റ്ററില്‍ കാണുന്നത്. ഫാദര്‍ നെടുമ്പള്ളിയായിട്ടാണ് ചിത്രത്തില്‍ ഫാസില്‍ എത്തുന്നത്.
വര്‍ഷങ്ങള്‍ക്ക് ശേഷമാണ് ഫാസില്‍ തിരശീലയ്ക്ക് മുന്നിലേക്ക് എത്തുന്നത്. 33 വര്‍ഷം മുന്‍പ് ഇറങ്ങിയ നോക്കത്താദൂരത്ത് കണ്ണും നട്ട്എന്ന ചിത്രത്തിലാണ് ഫാസില്‍ ആദ്യമായി അഭിനയിക്കുന്നത്.
കൂടാതെ ഹലോ മൈഡിയര്‍ റോംഗ് നമ്പര്‍ ഉള്‍പ്പടെയുള്ള നാല് ചിത്രങ്ങളില്‍ ചെറിയ വേഷം ചെയ്തു. ഫാസില്‍ അഭിനയിക്കുന്ന അഞ്ചാമത്തെ ചിത്രമാണ് ലൂസിഫര്‍. സിനിമയുമായി ബന്ധപ്പെട്ടു കിടക്കുന്നതിനാല്‍ അഭിനയം പുതുമയൊന്നുമല്ലെന്നാണ് ഫാസില്‍ പറഞ്ഞത്.
മോഹന്‍ലാല്‍ നായകനായി എത്തുന്ന ലൂസിഫറിന്റെ മുന്‍പ് ഇറങ്ങിയ പോസ്റ്ററുകളെല്ലാം വലിയരീതിയില്‍ ശ്രദ്ധിക്കപ്പെട്ടിരുന്നു.
മഞ്ജുവാര്യര്‍ നായികയായി എത്തുന്ന ചിത്രത്തില്‍ വിവേക് ഒബ്രോയ്, ഇന്ദ്രജിത്ത്, ടൊവിനോ തുടങ്ങിയവരും പ്രധാന വേഷത്തില്‍ എത്തുന്നുണ്ട്. മുരളി ഗോപിയുടെ തിരക്കഥയില്‍ ഒരുങ്ങുന്ന ചിത്രം നിര്‍മിക്കുന്നത് ആന്റണി പെരുമ്പാവൂരാണ്.
