മുംബൈ: പ്രളയം ഏല്‍പ്പിച്ച കനത്ത ദുരന്തത്തില്‍ നിന്നും ഒത്തൊരുമയോട് കൂടി ലോകത്തിന് മാതൃകയായി കരകയറുന്ന മലയാളികള്‍ക്ക് ഒാണാശംസയുമായി ഇന്ത്യന്‍ ക്രിക്കറ്റ് ടീം മുന്‍താരം വിരേന്ദ്ര സെവാഗ്. സമാനതകളില്ലാത്ത ദുരന്തത്തെ അതിജീവിക്കാന്‍ കേരളത്തിന് കഴിയട്ടെ എന്ന് പറഞ്ഞുകൊണ്ടാണ് സെവാഗിന്റെ ഓണാശംസ.
‘ മനുഷ്യത്വം ആഘോഷമാക്കിയ മനുഷ്യരെ നിങ്ങള്‍ക്കെന്റെ ഓണാശംസകള്‍… നിങ്ങളുടെ നാടിനെ പുനര്‍നിര്‍മ്മിക്കാന്‍ മഹാബലി ധൈര്യവും കരുത്തും നല്‍കട്ടെ’- സെവാഗ് ഫേസ്ബുക്കില്‍ കുറിച്ചു.
നൂറ്റാണ്ടിലെ പ്രളയത്തെ ഒത്തൊരുമയോടെ കേരളം അതിജീവിക്കുന്നത് ലോകശ്രദ്ധ നേടിയിരുന്നു. രക്ഷാപ്രവര്‍ത്തനത്തിനും ദുരിതാശ്വാസപ്രവര്‍ത്തനത്തിനും നാട്ടുകാരും ഉദ്യോഗസ്ഥരും ഒരുമയോടെ ആയിരുന്നു പ്രവര്‍ത്തിച്ചിരുന്നത്.
സച്ചിനും കോഹ്‌ലിയുമടക്കമുള്ള ക്രിക്കറ്റ് താരങ്ങള്‍ കേരളത്തിന് പിന്തുണയുമായി എത്തിയിരുന്നു. ഇംഗ്ലണ്ടിനെതിരായ മൂന്നാം ടെസ്റ്റിലെ മാച്ച് ഫീ ഇന്ത്യന്‍ ക്രിക്കറ്റ് താരങ്ങള്‍ മുഖ്യമന്ത്രിയുടെ ദുരിതാശ്വാസനിധിയിലേക്ക് നല്‍കുമെന്ന് അറിയിച്ചിരുന്നു.
നേരത്തെ യു.എന്‍ സംഘം ദുരിതാശ്വാസക്യാംപിന്റെ പ്രവര്‍ത്തനങ്ങളെ അഭിനന്ദിച്ചിരുന്നു.
