മലയാളികളുടെ പ്രിയപ്പെട്ട താരമാണ് മുകേഷ്. രസകരമായി ജീവിതാനുഭവങ്ങളും സംഭവങ്ങളുമൊക്കെ മുകേഷ് വിവരിക്കുന്നത് കേള്‍ക്കാനും പ്രേക്ഷകര്‍ക്ക് ഒരുപാടിഷ്ടമാണ്. ഇപ്പോഴിതാ ദുബായിലെ സ്‌കിറ്റിനിടയില്‍ സംഭവിച്ച ഒരു രസകരമായ കാര്യം പങ്കിടുകയാണ് മുകേഷ്. അന്ന് ദുബായിലെ സ്‌കിറ്റിനിടെ ആനിക്ക് പകരം ഭീമന്‍ രഘു വന്ന രസകരമായ സന്ദര്‍ഭമാണ് താരം വിശദീകരിക്കുന്നത്.
ആനിക്ക് പകരം ഭീമന്‍ രഘുവാണ് വന്നതെന്നറിഞ്ഞ് മമ്മൂട്ടി ഞെട്ടിയതിനെ കുറിച്ചാണ് മുകേഷ് പറയുന്നത്. ദുബായില്‍ നിന്ന് സ്‌കിറ്റ് കഴിഞ്ഞശേഷം താരങ്ങള്‍ എല്ലാവരും ബഹ്‌റൈനിലേക്ക് പോയി. അവിടെ എത്തിയപ്പോള്‍ പ്രശ്നം വന്നു. രാജ്യം വിട്ട് പോയാല്‍ ഒന്നുകൂടെ വിസ എടുത്തിട്ട് വേണം വരാന്‍. പുരുഷന്മാര്‍ക്ക് അവിടെ താമസിക്കാം. പക്ഷെ സ്ത്രീകള്‍ക്ക് ഒറ്റയ്ക്ക് താമസിക്കാമെങ്കിലും അവരുടെ അമ്മമ്മാര്‍ക്ക് അവിടെ താമസിക്കാന്‍ പറ്റില്ല. വേണമെങ്കില്‍ നാട്ടിലേക്ക് തിരിച്ചു പോയി വിസ എടുത്ത് വരണ്ടേ അവസ്ഥയായി.
ഇതോടെ ആകെ കണ്‍ഫ്യൂഷനായി. നിങ്ങളെല്ലാവരും പോയാല്‍ താന്‍ തകര്‍ന്നു പോകുമെന്ന് സ്പോണ്‍സര്‍ വന്ന് പറഞ്ഞതോടെ പുരുഷന്മാരൊക്കെ അവിടെ താമസിച്ചെന്നാണ് മുകേഷ് പറയുന്നത്. ഈ സമയത്ത് സ്ത്രീകള്‍ വിസയെടുക്കാന്‍ നാട്ടിലേക്ക് വന്നു. അങ്ങനെ പ്രോഗ്രാം നീട്ടിവെച്ചു.
സ്ത്രീ കലാകാരികളൊക്കെ നാട്ടില്‍ പോയ ശേഷം നമ്മളൊക്കെ അവര് തിരിച്ചു വരുന്നത് കാത്തിരിക്കുകയാണ്. ഈ സമയത്ത് ആനി ഷാജി കൈലാസുമായിട്ട് പ്രണയത്തിലായിരുന്നു. അത് നമ്മള്‍ അറിഞ്ഞിരുന്നില്ല.
ഈ സമയത്ത് തന്നെ അവര് തമ്മിലുള്ള വിവാഹവും കഴിഞ്ഞു. ആനി ഞങ്ങളെ വിളിച്ച് ഈ കാര്യം പറഞ്ഞു. കല്യാണം കഴിഞ്ഞത് കൊണ്ട് ഇനി അങ്ങോട്ട് വരുന്നില്ലെന്ന് പറയുകയായിരുന്നു. ഇത് വലിയൊരു അടി കിട്ടിയ പോലെയായിരുന്നു. ഇത്രയും മാസം റിഹേഴ്‌സല്‍ ചെയ്തിട്ട് പെട്ടെന്ന് നായിക എത്തില്ലെന്ന് പറഞ്ഞത് ഷോക്കായി പോയി.
എല്ലാവരും എന്തു ചെയ്യുമെന്നറിയാതെ നില്‍ക്കുകയായിരുന്നു. പിന്നെയുള്ള നായികമാരൊക്കെ മലയാളം അത്ര അറിയുന്നവരല്ല. അവരൊക്കെ ഡാന്‍സ് ചെയ്യുന്നവരാണ്. പിന്നെ ചെറിയ ഡയലോഗൊക്കെ പറയുമെന്നേയുള്ളു.
ഇതാകട്ടെ, സ്‌കിറ്റ് ലൈവാണ് ചെയ്യേണ്ടത്. റെക്കോഡ് ചെയ്ത് വെച്ചതാണെങ്കില്‍ ഏതെങ്കിലും ഒരു നായികയെ കൊണ്ടു വന്ന് ലിപ് മൂവ്മെന്റ് ചെയ്യിക്കാമായിരുന്നു. ലൈവായത് കൊണ്ട് ഇത്രയും വലിയ റോള്‍ ആര്‍ക്ക് കൊടുക്കാന്‍ പറ്റും. ഉടനെ ഇവിടുന്ന് നാട്ടിലേക്ക് വിളിച്ച് മലയാളം അറിയാവുന്ന ആരെയെങ്കിലും കയറ്റി വിടാന്‍ പറഞ്ഞു. അവരതു ചെയ്യാമെന്ന് പറയുകയായിരുന്നു.
ഇടക്ക് വിളിക്കുമ്പോഴൊക്കെ നാട്ടില്‍ നിന്ന് പറയുന്നത്, അവര് പുതിയ ആള്‍ക്ക് വേണ്ടി ശ്രമിക്കുകയാണ് എന്നായിരുന്നു. ഷോയുടെ രണ്ട് ദിവസം മുമ്പാണ് പുതിയ ആളെത്തുന്നത്. ആള്‍ എയര്‍പോര്‍ട്ടില്‍ വന്നിറങ്ങുന്നത് കാത്തുനിന്ന ടീമിനെ മുഴുവന്‍ ഞെട്ടിച്ച് കൊണ്ട് ആനിക്ക് പകരം വന്നിറങ്ങിയത് ഭീമന്‍ രഘുവാണ്.
ALSO READ- ഇത് സന്തൂര്‍ മമ്മി തന്നെ, ശാലിനിക്കൊപ്പം ചിരിച്ചുകൊണ്ട് ഫോട്ടോയ്ക്ക് പോസ് ചെയ്തു മകള്‍
ഇതോടെ എല്ലാവരും ഭീമന്‍ രഘുവിന്റെ പിന്നിലേക്ക് നായികയെ നോക്കി നിന്നു. നായിക ഇറങ്ങി വരുന്നത് പ്രതീക്ഷിച്ചാണ് നിന്നത്. പക്ഷെ പിന്നില്‍ നിന്ന് ആരും വന്നില്ല. ഭീമന്‍ രഘു നേരെ നടന്നു വന്ന് കൈ തന്നു പറഞ്ഞു, ആനിക്ക് പകരം ഞാനാണ് വന്നിരിക്കുന്നതെന്നു.
എന്തെങ്കിലും പറഞ്ഞാല്‍ അദ്ദേഹത്തിന് വിഷമം ആകുമെന്ന് കരുതി താന്‍ തലയാട്ടി കൊണ്ട് നിന്നു. എന്നിട്ട് എയര്‍പോര്‍ട്ടില്‍ നിന്നും ഹോട്ടലിലേക്ക് വിളിച്ചു. ഉടനെ അവിടുന്ന് പുതിയ ആളാരാണെന്നു ചോദിച്ചു. ഉഗ്രന്‍ പാര്‍ട്ടിയാണെന്നും നല്ല ഫിഗറും ശക്തിയുമുള്ള ആളാണെന്നും പറയുകയായിരുന്നു.
ഈ സമയത്ത് മമ്മൂക്ക പെട്ടെന്ന് വന്ന് ഡാ പുല്ലേ ആരാണെന്ന് പറയടാ എന്ന് പറയുകയായിരുന്നു. അപ്പോള്‍ താന്‍ ഭീമന്‍ രഘുവാണെന്ന് പറഞ്ഞു. മമ്മൂക്ക അത് വിശ്വാസിച്ചില്ല. അപ്പോള്‍ ഭീമന്‍ രഘു മാത്രമെ വന്നിട്ടുള്ളൂവെന്നും വേറെ ആരും വന്നിട്ടില്ലെന്നും പറഞ്ഞപ്പോള്‍ അതു കേട്ട് മമ്മൂക്ക ഞെട്ടി.
അതേസമയം, രഘുവിനാണെങ്കില്‍ ഒന്നും അറിയില്ല. പെട്ടെന്ന് ഒരാളെ വേണമെന്ന് പറഞ്ഞപ്പോള്‍ താന്‍ വന്നതാണെന്ന് പറഞ്ഞു. അതോടെ നേരെ നാട്ടിലേക്ക് വിളിച്ചു. അവിടുന്ന് വന്ന മറുപടി, പലരെയും വിളിച്ചു. ആര്‍ക്കും ഡേറ്റില്ല. ഉള്ളവരൊക്കെ വലിയ റേറ്റാണ് പറയുന്നതെന്നായിരുന്നു.
ഭീമന്‍ രഘു ഫ്രീ ആയിട്ട് ആ സമയത്ത് ഉണ്ടായിരുന്നത് കൊണ്ടും അയാള്‍ക്ക് അവര് പറഞ്ഞ റേറ്റ് ഓക്കെയായത് കൊണ്ടും ആനിക്ക് പകരം ഭീമന്‍ രഘുവായി വന്നതെന്നാണ് മുകേഷ് വെളിപ്പെടുത്തിയത്.
