പാതി മലയാളിയായ ബോളിവുഡ് താര സുന്ദരിയാണ് വിദ്യാ ബാലന്‍. ഏറെ നാളത്തെ കഠിന പ്രയ്തനത്തിലൂടെ ആണ് ബോളിവുഡില്‍ തന്റേതായൊരു ഇടം വിദ്യാബാലന്‍ ഉണ്ടാക്കിയെടുത്തത്. ഇപ്പോള്‍ ബോളിവുഡിലെ ലേഡി സൂപ്പര്‍ താരമായി വിലസുകയാണ് നടി.
അതേ സമയം ഈ താര സിംഹാസനത്തിലേയ്ക്ക് ഉളള വിദ്യയുടെ യാത്ര അത്ര എളുപ്പമായിരുന്നില്ല. പൂച്ചെണ്ടുകള്‍ കൊണ്ട് മാത്രമല്ല, കൂര്‍ത്ത കുപ്പിച്ചില്ലുകളും വിരിച്ചായിരുന്നു സിനിമാലോകം വിദ്യയെ സ്വീകരിച്ചത്. ഇന്നും ആ അനുഭവങ്ങള്‍ മായതെ കിടക്കുന്നുണ്ട് വിദ്യയുടെ മനസ്സില്‍.
ഇപ്പോഴിതാ സിനിമയിലെത്തിയപ്പോഴുള്ള തന്റെ അനുഭവങ്ങള്‍ വെളിപ്പെടുത്തുകയാണ് താരം. വിദ്യയുടെ കരിയറില്‍ ആദ്യം ചെയ്ത സിനിമകളിലൊന്നായിരുന്നു മോഹന്‍ലാല്‍ നായകനായ ചക്രം. എന്നാല്‍ ആ സിനിമ പുറത്തിറങ്ങാതെ പോയി. ഇതിന് പിന്നാലെ പല പ്രൊജക്ടുകളില്‍ നിന്നും താരത്തെ ഒഴിവാക്കുക വരെയുണ്ടായി.
ഇതോടെ താന്‍ കടുത്ത നിരാശയിലായിരുന്നു. തന്റെ വിഷമങ്ങളെല്ലാം പറഞ്ഞിരുന്നത് വീടുനടുത്തുള്ള സായിബാബ മന്ദിരത്തില്‍ പോയി ബാബയോടായിരുന്നുവെന്നും രാത്രിയില്‍ ആരുമില്ലാത്ത സമയത്ത്‌പോലും അവിടെ പോയിട്ടുണ്ടെന്നും വളരെ കഷ്ടപ്പാടുകള്‍ നിറഞ്ഞ സമയമായിരുന്നു അതെന്നും താരം പറയുന്നു.
താന്‍ ചെയ്യാത്ത കാര്യത്തിന് ശിക്ഷിക്കപ്പെടുന്നത് പോലൊക്കെ തോന്നിയിരുന്നു. തന്റെ വിശ്വാസം പോലും പരീക്ഷിക്കപ്പെടുന്നത് പോലെ തോന്നിയെന്നും എന്തിന് വേണ്ടിയാണ് തനിക്ക് ഇത്രത്തോളം പ്രതീക്ഷ നല്‍കിയതെന്ന് പലപ്പോഴും ബാബയോട് ചോദിച്ചിരുന്നുവെന്നും വിദ്യ പറയുന്നു.
