കാഞ്ഞങ്ങാട്: കാഞ്ഞങ്ങാട് നഗരമധ്യത്തിലെ ഒരു ഷോപ്പിംഗ് കോംപ്ലക്സിലെ സ്ത്രീകള്‍ ഉപയോഗിക്കുന്ന ശുചിമുറിയില്‍ മൊബൈല്‍ ക്യാമറ ഉപയോഗിച്ച്‌ ദൃശ്യങ്ങള്‍ പകര്‍ത്താന്‍ ശ്രമിച്ച കൗമാരക്കാരനെ തന്ത്രപൂര്‍വ്വം കുടുക്കിലാക്കി.
സ്ത്രീകള്‍ ശുചിമുറിയില്‍ കയറിയാല്‍ പലപ്പോഴും ദൃശ്യങ്ങള്‍ പകര്‍ത്തുന്നുണ്ടെന്ന് സംശയം തോന്നിയാണ് ഷോപ്പിംഗ് കോംപ്ലക്സിലെ വ്യാപാരികള്‍ വലയൊരുക്കിയത്. വെള്ളിയാഴ്ച രാവിലെ ഷോപ്പിംഗ് കോംപ്ലക്സിലെ ഒരു യുവതിയെ ശുചിമുറിയിലേക്ക് പറഞ്ഞുവിട്ട് വ്യാപാരികള്‍ ഒളിച്ചിരുന്നു.
ശുചിമുറിയില്‍ കയറിയ യുവതി പൈപ്പ് തുറന്നുവിട്ടു. വെള്ളം വീഴുന്ന ശബ്ദം കേട്ടപ്പോള്‍ തൊട്ടടുത്ത മൊബൈല്‍ കടയിലെ കൗമാരക്കാരന്‍ പതുങ്ങിവന്ന് ഗ്രില്‍സിന്റെ വിടവിലൂടെ ദൃശ്യങ്ങള്‍ പകര്‍ത്താന്‍ ശ്രമിച്ചു. ഇതിനിടയില്‍ ഒളിച്ചിരുന്ന വ്യാപാരികള്‍ പയ്യനെ പിടികൂടി.
ആളുകള്‍ തടിച്ചുകൂടിയതോടെ വിവരമറിഞ്ഞ് പോലീസും സ്ഥലത്തെത്തി. പയ്യനെ പോലീസ് സ്റ്റേഷനിലേക്ക് കൊണ്ടുപോയി. ക്യാമറ പരിശോധിച്ചപ്പോള്‍ അതില്‍ ദൃശ്യങ്ങള്‍ ഒന്നുമില്ലെന്ന് വ്യക്തമായി. കൗമാരക്കാരനായതിനാലും ആര്‍ക്കും പരാതിയില്ലാത്തതിനാലും പയ്യനെ താക്കീത് നല്‍കി വിട്ടയച്ചു.
